PAGSULAT NG NADALUMAT
laging abala ang aking diwa
nakaraan ay sinasariwa
kasalukuyan ay pulutgata
hinaharap ay bagong simula
paano babasahin ang isip
at isalansan ang nalilirip
may prinsipyong laging halukipkip
may dakilang walang kahulilip
ang ideya'y lalambi-lambitin
kung di sa bangin ay nasa hangin
minsan, nais ko itong liparin
at mga bituin pa'y sungkitin
abalang muli sa pagsusulat
ng naninilay, ng nadalumat
minsan, mga libro'y binubuklat
baka asam na diwa'y malambat
- gregoriovbituinjr.
01.24.2025
Walang komento:
Mag-post ng isang Komento