CONDONG NAKAHARANG SA MT. FUJI, GIGIBAIN NA...
photobomb pala ang condong / nakaharang sa Mt. Fuji
kaya nagprotesta roon / ang mamamayan, ang madla
na nagnanais tuluyang / ipagiba ang nasabi
lakas ng kilos-protesta'y / balita sa buong bansa
malapit nang i-turn-over / sa nakabili ng yunit
subalit mga protesta'y / tila di mapatid-patid
sa masa'y nakipulong pa / roon nang paulit-ulit
ang estate developer na / Sekusui House Limited
ang kanilang unang balak / ay labing-isang palapag
hanggang maging sampu na lang / na ang kisame'y mababa
ngunit nakaharang pa rin / ang condo kaya di payag
ang mga nagpo-protestang / nais itong ipagiba
kaya wala nang magawa / ang nasabing developer
nagpasya nang idemolis / ang condo nilang tinayo
ire-refund na lang nila / sa kanilang mga buyer
ang sampung milyong yen bawat / yunit, sa bulsa'y madugo
dahil sa mga protesta / ng mamamayang Hapones
gigibain ang photobomb / na humarang sa Mt. Fuji
at tayo naman, sa Torre / de Manila nagtitiis
na sa estatwa ni Rizal / ay photobomb din ang silbi
- gregoriovbituinjr.
06.17.2024
* ulat mula sa pahayagang Pilipino Star Ngayon, Hunyo 15, 2024, pahina 5
Walang komento:
Mag-post ng isang Komento