NILAY
naritong nakatitig sa ulap
pagkat buhay ay aandap-andap
nais sumakay sa alapaap
nang tunguhin ang pinapangarap
nakatunganga muli sa notbuk
upang kathain ang ilalahok
sa patimpalak, isang pagsubok
kung makakarating ba sa tuktok
nakasulyap pa rin sa kawalan
walang malirip sa katagalan
ginawa'y nagpahinga na lamang
at nakatulog sa kalaunan
ganito minsan pag nagmumuni
minsan, nakatingin sa kisame
pinagninilayan ang diskarte
upang kwento't tula'y mapabuti
- gregoriovbituinjr.
02.20.2024
Walang komento:
Mag-post ng isang Komento