tapa, sinangag, itlog
kinakain ng kalog
sadyang nakabubusog
pagkaing pampalusog
kung ayaw ng sinangag
ayos lang, walang palag
may ibang ilalatag
gayundin sa magdamag
tapa, sinaing, itlog
wala nang ibang sahog
basta ba makabusog
sa tiyang nangangatog
sa gutom na'y panlaban
tiyan na'y malalamnan
sisigla ang kalamnan
sa tapsilog ng bayan
kahit buhay ko'y salat
aking pasasalamat
sa tapsilog nabundat
ang katawan kong payat
- gregoriovbituinjr.
04.03.2022
Walang komento:
Mag-post ng isang Komento