MASARAP NA HAWAIIAN DISH
sa T.V. nga, Hawaiian dish ay makatawag-pansin
nakakatuwang pakinggan ang kanilang lutuin
masarap kaya ito kung sakaling papapakin
aba'y talaga naman, mukhang kaysarap kainin
pinaksa sa telebisyon ang kultura sa Hawaii
pati iba't ibang lugar doon ang natalakay
pinanood, pinakinggan, ngayon ay nagninilay
nakatingin sa kisameng nangangarap ng husay
ngunit di ko pa napuntahan ang lugar na iyon
na kayrami raw naggagandahang tanawin doon
kung may pera lang ay masarap doong magbakasyon
doon magsusulat ng mga panibagong hamon
berde rin ang utak nitong naglagay ng pamagat
na sa taga-Hawaii ay karaniwan lang na sulat
subalit sa Pinoy, kahulugan nito'y dalumat
na ngingiti ka na lang upang ikaw ay kumagat
Oh, kaysarap ng Hawaiian dish, nais kong matikman
na baka rito'y katumbas ng kalamay o suman
ngunit sa tanda ko nang ito, ako'y mahihirapan
Hawaiian dish na ito'y hahanapin dito na lang
- gregoriovbituinjr.
* litratong kuha mula sa Unang Hirit ng GMA7, 05.03.2021
Walang komento:
Mag-post ng isang Komento