Ang tugmaan sa tulâ kong "Pluma't Kwaderno"

ANG TUGMAAN SA TULÂ KONG "PLUMA'T KWADERNO"

Maikling sanaysay ni Gregorio V. Bituin Jr.

Sinubukan kong kumathâ ng tulang may iba't ibang tugmaan. Magkatugmâ ang dalawang magkakasunod na taludtod sa loob ng apat na saknong.

Inihalimbawà ko ang taludturan sa Shakespearean (English) sonnet at sa Petrarchan (Italian) sonnet. Sa Shakespearean ay may tugmaang A-B-A-B, C-D-C-D, E-F-E-F, at G-G, habang sa Petrarchan sonnet naman ay may tugmaang A-B-B-A, A-B-B-A, C-D-E, C-D-E.

Ang dalawang nabanggit ay soneto, o tulang may tugma't sukat at labing-apat na taludtod. Ang aking kinatha'y may labing-anim na taludtod sa apat na saknong.

Ang ginawà kong tugmaan sa tulang "Pluma't kwaderno" ay: A-A-B-B, C-C-D-D, E-E-F-F, at G-G-H-H. Narito ang nasabing tula:

PLUMA'T KWADERNO

palagi akong may dalang

pluma't kwaderno sa bulsa

at sa bag, lalo na't handang

magsulat ang mangangathâ

sa dadaluhan kong pulong

ay ilalabas na iyon

susulat ng katitikan

o mga napag-usapan

at sa paghabi ng kwento

at tulâ, handang totoo

itatala'y nasa isip

upang di iyon mawaglit

dinanas ng aping uri

dahil sa trapong kadiri

sa akda'y pinagbubuti

upang sa bayan magsilbi

Sa unang saknong, ang tugmaan ay A-A-B-B, magkatugmâ ang "dala" at "bulsa, habang magkatugmâ naman ang "handâ" at "mangangathâ". Ang tugmaan ay hindi A-A-A-A kahit kapwa titik "a" ang dulo ng mga salitâ, kundi A-A-B-B dahil ang "dala" at "bulsa" ay walang impit sa dulo ng salitâ, habang ang "handâ" at "mangangathâ" ay may impit. Sa ating panulaang Pilipino, hindi magkatugmâ ang salitang may impit at walang impit kahit pareho ang dulong titik, tulad ng "dugô" at "berdugo" ay hindi magkatugmâ.

Pansinin, ang "dala" at "handâ" ay may hulaping "ng". Hindi magkatugma ang "dalang" at "handang" na ginamit sa nasabing tulâ dahil di kasama ang hulapi sa tugmaan, kundi yaong salitang ugat na "dala" at "handâ".

Sa ikalawang saknong, ang tugmaang C-C-D-D. ay halatâ agad at madaling makita. Ang "pulong" at "iyon" ay magkatugmâ, at kapwa "an" ang dulo ng "katitikan" at "napag-usapan".

Sa ikatlong saknong, sa tugmaang E-E-F-F, ang "kwento" at "totoo" ay magkatugmâ. Ang "isip" at "mawaglit" kahit magkaiba ng dulong pantig na "ip" at "it" ay magkatugmâ, batay sa batas sa katutubong panulaan, na ang katinig na malakas na "B, K, D, G, P, S, T" ay magkatugmâ, habang magkatugmâ naman ang "L, M, N, NG, R, W, Y" na pawang katinig na mahina. Kayâ ang "balag" at "balam" ay hindi magkatugmâ, habang ang "bakas" at "bakat" ay magkatugmâ.

Sa ikaapat na saknong, ang tugmaan ay G-G-H-H, bagamat lahat ng salita ay nagtatapos sa titik "i". Ang salitang "uri" at "kadiri" ay magkatugmâ, at kapwa may impit, habang magkatugmâ rin ang walang impit na salitang "pinagbubuti" at "magsilbi". Hindi magkatugmâ  ang "kadiri" at "magsilbi".

03.03.2026

Pluma't kwaderno

PLUMA'T KWADERNO

palagi akong may dalang

pluma't kwaderno sa bulsa

at sa bag, lalo na't handang

magsulat ang mangangathâ

sa dadaluhan kong pulong

ay ilalabas na iyon

susulat ng katitikan

o mga napag-usapan

at sa paghabi ng kwento

at tulâ, handang totoo

itatala'y nasa isip

upang di iyon mawaglit

dinanas ng aping uri

dahil sa trapong kadiri

sa akda'y pinagbubuti

upang sa bayan magsilbi

- gregoriovbituinjr.

03.03.2026

Nahuli na namang Barok ang pamagat

NAHULI NA NAMANG BAROK ANG PAMAGAT

imbes "2 raliyistang inaresto..."

ay "2 raliyista na inaresto..."

batid agad di Pinoy ang nagsulat nito

orihinal sa Ingles, isinalin ito

ng A.I., kaya naging Barok ngang totoo

panahon pa ba ng Kastila, kaya ganyan sila?

"dalawa raliyista na inaresto, laya na"

balitang Pinoy na binarok, dapat itama na

sa "dalawang raliyistang inaresto, laya na"

iyan ang hirap pag tamad ang nagsasalin

google translate o A.I. na ang gagamitin

nagiging Barok tuloy ang salita natin

tila baga Kastilaloy ay uso pa rin

di ba nakikita ng editor ang ganyan?

dahil mabilisang ulat, hinahayaan?

Barok ang A.I. sa pagsalin ng salitâ

huwag asahan ang A.I. sa Salin-Wikà

kung Pinoy ang nagsulat ay mahahalatâ

ngunit kung A.I., wika'y binabalahurà

- gregoriovbituinjr.

03.02.2026

Total lunar eclipse sa Marso 3, 2026

TOTAL LUNAR ECLIPSE SA MARSO 3, 2026

napabalita sa isang pahayagan

total lunar eclipse ay masasaksihan

at makikita natin sa kalawakan

isang astronomikal na kaganapan

kung saan ang sabi'y tatakpan ng buwan

ang anino ng mundo mula sa araw

daigdig ay direktang nasa pagitan

ng araw at buwan, kaya ang anino

ng daigdig ay lubos na tumatakip

sa buwan, at sinasalà ng liwanag

ng araw ang ating atmospera, buwan

naman ay magmumukhang mamula-mula

ang sabi pa'y ligtas itong panoorin

ng karaniwang mata lamang, di tulad

ng solar eclipse na kinakailangan

mong magsalamin, proteksyunan ang mata

isang oras umano ang itatagal

niyong pinakamatingkad na bahagi

ng eklipse't magpapakita ang buwan

ng kakaibang pula at maliwanag

isa ngang pagkakataong pambihirà

para sa tulad kong Bituin at makatâ

ang ibinalita ng astronomiya

isang paksang nais kong pag-aralan pa

- gregoriovbituinjr.

03.02.2026

* tula't ulat batay sa pahayagang Pang-Masa, Pebrero 27, 2026, p.7

Nakakapagod mang magsulat

NAKAKAPAGOD MANG MAGSULAT

nakakapagod mang magsulat

gagawin ko pa rin ang lahat

ng kaya kahit anong bigat

upang magsulat at magmulat

ako man ay abang makatâ

kumakathâ para sa madlâ

ng kwento, tulâ at pabulâ

asahang pluma'y magdadagtâ

pag pagod, magpahinga muna

at ipikit ang mga mata

isiping mayroong pag-asa

pag ang masa'y nagsama-sama

kumain at maging malusog

upang sa diwa'y umimbulog

ang mga paksang may indayog

na sa puso'y nakadudurog

- gregoriovbituinjr.

03.02.2026

* litrato mulâ sa larong Word Connect sa selpon

AlTangHap

ALTANGHAP

ALmusal, TANGhalian, HAPunan - Altanghap

minsan o madalas, iyan ang kinakain

habang nagninilay, hinahabi'y pangarap

at sinusulat ng pluma'y isyung pambayan

kanina, inulam ko'y talbos ng sibuyas

kahalo'y kamatis at pinitpit na bawang

mayroon pang tuyong sapsap at tuyong biklad

pinagsabay ang almusal at tanghalian

iyon pa rin ang inulam ko ngayong gabi

pagkat kayrami, di naubos ng tanghali

altanghap na'y sadyang nakagawian dini

lalo't may pupuntahan at nagmamadali

ganyan ang buhay ng isang bálo tulad ko

mahalaga'y lamnan ang tiyan, walang sakit

mag-altanghap at tiyaking may ehersisyo

at makapagsulat pa rin, sulit na sulit

- gregoriovbituinjr.

03.01.2026

Daksipat pala'y teleskopyo

DAKSIPAT PALA'Y TELESKOPYO  

mayroon palang wikang Filipino

sa largabista o sa teleskopyo

subalit wala pa sa diksyonaryo

nang ito'y talagang saliksikin ko

kung ang matematika ay sipnayan

at ang aritmetika ay bilnuran

kaybuting daksipat ay natutunan

doon pa sa krosword na sinagutan

marahil galing ito sa Cebuano

dakô o malaki'y makikita mo

sa sipat o sinilip mong totoo

dakô at sipat, daksipat na ito

kuro-kuro ko'y dapat matiyak pa

salita'y saan nagmulâ talaga

hinanap ko ang etimolohiya

daksipat ay nasa Wikipedia na

pasya ko'y gamitin na ang daksipat

sa pagtulâ at kwentong isusulat

wikang sarili'y payabunging tapat

sa salitang ito, daghang salamat!

- gregoriovbituinjr.

03.01.2026

* mula sa palaisipan sa pahayagang Pang-Masa, Pebrero 24, 2026, p.7

CAPITOL, TOPICAL, OPTICAL, COALPIT

CAPITOL, TOPICAL, OPTICAL, COALPIT

pitong rambol na titik ang pinilit

kong buuin, lahat ng letra'y gamit

apat na salita'y nabuong saglit:

CAPITOL, TOPICAL, OPTICAL, COALPIT

nakatutuwang makita ang ganyan

tulad din ng BEDROOM at BOREDOM iyan

inip ka na ba sa iyong tulugan?

SILENT ay LISTEN; SILENCE ay LICENSE man

tara, minsan, maglaro ng Word Connect

nang sa BEDROOM ay di BOREDOM ang hibik

hulaan lang sa nirambol na titik

ang salitang buuin mong tahimik

ganyan, Word Connect pag nagpapahinga

nalilibang ang sariling may dusa

panahong wala mang kwento'y may kwenta

minsan sa lumbay ito'y tagasalba

- gregoriovbituinjr.

02.28.2026

Pagdalo sa "Hugyaw" sa pagtatapos ng Buwan ng Sining

PAGDALO SA "HUGYAW" SA PAGTATAPOS NG BUWAN NG SINING

Maikling sanaysay at tulâ ni Gregorio V. Bituin Jr.

Bilang panitikero at makatâ, dinaluhan ko ang iba't ibang aktibidad ngayong Pebrero - ang Buwan ng Sining. Mula sa dalawang araw na Pasinayà 2026 mula Pebrero 7-8 hanggang Hugyaw ng Pebrero 27. Bukod sa Buwan ng Panitikan tuwing Abril ay binigyan kong halaga ang Buwan ng Sining.

Sapagkat ang mga makatâ ay hindi lang nasa panitikan kundi ang pagtulâ ay isang sining din mula pa noong unang panahon.

Mula sa isang pagkilos sa panawagang pagpapalaya sa dalawang kasamang dinakip ng mga pulis sa kasagsagan ng pagdiriwang ng Edsa@40 at napiit sa Mandaluyong, ay nagtungo ako sa Metropolitan Theater upang panoorin ang Hugyaw ng ikaanim ng gabi.

Ang pamagat ng closing program ng Buwan ng Sining ay "Hugyaw: Ugnayan ng Galing, Katotohanan at Giting" na magsisimula ng ikaanim ng gabi, ayon sa programa, Open to the Public at Free Admission. Nakaabot ako roon, mabuti't nag-umpisa iyon ng 6:40 pm at natapos sa ganap na ikawalo ng gabi.

Ang hugyaw ay salitang Bisaya, na ibig sabihin ay "tagumpay sa labanan" (mula sa Diksiyonaryong Adarna, pahina 324. Ito naman ang nakita ko sa google: "Hugyaw is a Cebuano and Hiligaynon (Visayan) word meaning a loud, joyous shout, cheer, or roar of excitement from a crowd. Often associated with festivals, it signifies merry-making, jubilation, and loud celebration. It is frequently used to describe the energetic, festive atmosphere of a parade or fiesta." (Ang Hugyaw ay  salitang Cebuano at Hiligaynon (Visayan) na nangangahulugang malakas, masayang hiyawan, palakpakaan, o dagundong ng pananabik mula sa mga nagsidalo. Madalas itong iniuugnay sa mga kapistahan, nagsasaad ito ng pagsasaya, kagalakan, at malakas na pagdiriwang. Madalas itong ginagamit upang ilarawan ang masigla at masayang kapaligiran ng isang parada o pista."

Binati ng tagapagpadaloy ang presensya ni National Artist for Literature Virgilio S. Almario. Kinilala rin ang gawa ng iba't ibang National Artist, tulad nina Nora Aunor at Fernando Poe Jr (sa Film), Francisco Manosa at Ildefonso Santos Jr. (sa Arkitektura), Ramon Obusan (sa Sayaw), Lucio San Pedro at Levi Celerio (sa musika), at marami pang iba. Doon ay nagtanghal ang iba't ibang grupo tulad ng Wincess Jem, Lucky G., JM Yesures, Shanne Gulle, ang University of Santo Tomas Singers, Bayanihan National Folk Dance Group, Ramon Obusan Folkloric Group, Quartet, Douglas Nierras Powerdance Philippines Foundation Inc., Ballet Philippines, atbp. Pinarangalan naman bilang Ani ng Sining ang UST Singers.

Isinayaw din ang mga katutubong sayaw, tulad ng sayaw ng mga Ifugao, Pandanggo sa Ilaw, Tinikling, Maglalatik (o sayaw gamit ang bao ng niyog), at marami pang iba. Ipinarada rin ng mga nagggagandahang dilag ang iba't ibang katutubong habi tulad ng Pis Yabit ng mga Tausug, T'nalak ng mga T'boli, Tenun ng mga Yakan, Wanno ng mga Ifugao, Batik ng Indonesia, at Thai Silk.

Sa mga tulad ko'y di ko pinalalampas o binabalewala ang ganitong pagdalo sa mga aktibidad bilang pagpapakita ng katapatan sa sining, bukod pa sa may maisusulat. Kahit maraming gawain, kahit laging nasa kalsada at may ipinaglalaban, ay isinisingit ang ganitong gawain. Pangarap ko ring makapaglunsad ng aklat ko ng mga tulâ sa MET, at makapagbigkas din ng tulâ sa bulwagan nito.

Sa Concert at the Park sa Luneta, ilang taon na ang nakararaan ay napakinggan ng namayapa kong misis ang aking pagbigkas ng tulâ sa harap ng maraming taong dumalo roon. Subalit kung makakapagbigkas ako ng tulâ, kung sakali lang, sa MET, hindi na niya iyon mapakikinggan.

Mahalaga ang Buwan ng Sining at ang Buwan ng Panitikan, kaya anumang aktibidad mayroon bilang pagpupugay sa sining at sa panitikan, asahan nang magtutungo ako roon. Basta't kaya ng biyahe, ng katawan, at ng oras (walang kasabay).

HUGYAW

mula sa isang pagkilos ng mga kasama

upang palayain sina Parducho't Odeña

kung saan tula'y binigkas para sa kanila

ay agad akong bumiyahe't sa MET pumunta

dumalo sa pagtatapos ng Buwan ng Sining

tawag ay Hugyaw: saya, artista, awit, giling

"Ugnayan ng Galing, Katotohanan at Giting"

libreng palabas, karaniwang tao'y kapiling

isang matandang sining ang pagkatha ng tulâ

tulad nina Balagtas at Batute, makatâ

sa pagdiriwang ng sining, dinaluhang sadyâ

wala man sa toreng garing kaming mangangathâ

maraming salamat sa sining, ako'y namulat

upang kumilos sa mundong kayraming nagkalat

na basura, kurakot, trapong ahas ang balat

upang pagbalikwasin ang bayang di pa dilat

02.28.2026

Talbos ng sibuyas

TALBOS NG SIBUYAS

bente pesos ang tatlong piraso

ng nabiling talbos ng sibuyas

mayaman sa Bitamina A, C,

K, at fiber o hibla, mabuti

at pampalakas ng immune system

nagpapabuti rin ng panunaw

at nagpapatibay rin ng buto

sagana rin daw sa antioxidant

tumutulong bumaba ang presyon

ng kolesterol, at mayroon ding

anti-inflammatory properties

na anong inam para sa puso

at pangkalahatang kalusugan

kaya itong talbos ng sibuyas

ay inuulam ko't pampalakas

- gregoriovbituinjr.

02.28.2026

* datos mula sa google

Napanaginipan ko'y relo

NAPANAGINIPAN KO'Y RELO

napanaginipan ko'y isang relo

kaybilis ng ikot ng kamay nito

anong tulin ng inog ng minuto

parang nasa "Back to the Future" ako

natandaan ko pa ang panaginip

anong kahulugan, di pa malirip

tagumpay ba ako sa naiisip

na nobelang di mo ikaiinip

isa kayang "Time Machine" ang orasan

muli bang pagtahak sa nakaraan

o lakbay tungò sa kinabukasan

o baka pagtungò sa kalawakan

bakit ikot ng kamay ay kaybilis

pinagmadali ba akong magbihis

nang puntahan ang lugar na tahimik

ingat lang baka malubog sa putik

- gregoriovbituinjr.

02.27.2026

* litrato mula sa google

* "Back to the Future" - isang pelikula noong 1985, na napanood noon ng makatâ sa sinehan

* "Time Machine" - isang science fiction novel ni H. G. Wells, na nalathala noong 1895

Sa 9th Black Friday Protest ng 2026

SA 9TH BLACK FRIDAY PROTEST NG 2026

sa harap ng istasyon ng pulis sa Mandaluyong

ginanap ang pangsiyam na Black Friday Protest ngayon

dalawang prinsipyadong tibak ang doon kinulong

imbes na yaong sa pondo ng bayan ay nandambong

dinakip sina Three Odeña at Edel Parducho

sa rali sa ikaapatnapung anibersaryo

ng Edsa, at kinasuhan ng gawa-gawang kaso

silang tagapagtanggol ng karapatang pantao

direct assault umano'y ikinaso sa kanila

sa payapang pagkilos, pulis ay ginulo sila

nanggulo'y pulis, nanggulo sa payapang protesta

nang ginunita nami'y Unang Pag-aalsang Edsa

ang aming sigaw: "P.N.P. Protektor ng Korap!"

trapong hunyangò at kurakot sa bayan pahirap

kurakot na lingkod bayan, ikulong, panagutin!

sina Three Odeña, Edel Parducho, palayain!

- gregoriovbituinjr.

02.27.2026

* litrato kuha sa nasabing pagkilos

Kahapon

KAHAPON

di ko na sila naabutan

leyt ko na kasi nabatid

subalit aking sinubukan

ang pagmamadali'y di lingid

apat na sakay ang inabot

traysikel, bus, MRT, at dyip

buong sitihol ay inikot

wala na, ako'y napaisip

tanging hingi ko'y paumanhin

di na umabot sa pagkilos

sinubukan, pumunta pa rin

kahit sa pamasahe'y kapos

tungkulin pa rin ay ginawa

biyahe ma'y nakakapagod

nais kong tupdin ang adhika

kaya narito't sumusugod

- gregoriovbituinjr.

02.27.2026

Palayain sina Three Odeña at Edel Parducho!

PALAYAIN SINA THREE ODEÑA AT EDEL PARDUCHO!

di ba't ang diwa ng Edsa ay paglaya ng masa

mula sa kuko't pangil ng bangis ng diktadura

kaya apat na dekada ng Edsa'y inalala

diwa nito'y paglaya ng bayan mula sa dusa

panawagan din ito laban sa mga kurakot

sa kaban ng bayan, at managot lahat ng sangkot

wakasan na ang dinastiya't sistemang baluktot

na sanhi kaya nagbundatan ang mga balakyot

dapat managot sa bayan ang mga mandarambong

tulad ng mga kontrakTONG, TONGresman at senaTONG

silang mga pulitikong kawatan ang ikulong

di ang mga mapagpalayang tibak natin ngayon

mga nagmartsa tungong Edsa upang ipagdiwang

ang anibersaryo ng Edsa'y agad na hinarang

dalawang aktibista'y dinakip ng kapulisan

sila'y ikinulong, imbes mga trapong kawatan!

palayain sina Three Odeña't Edel Parducho!

na tanging kasalanan ay nanindigang totoo!

nanindigan sa Edsa, tumindig laban sa trapo!

nanindigan sila para sa masa, prinsipyado

- gregoriovbituinjr.

02.26.2026

* litrato mula sa fb

02.26.2026

02.26.2026

rambulin ang numero ng taon

aba'y iyon din ang petsa ngayon

habang nilay ko ang nilalayon

sa búhay na may yakap na misyon

patuloy pa rin ang pagsusulat

ng isyung di akalaing sukat

ng mga usaping mapagmulat

ng mga pagpuri't panunumbat

katatapos ng rali sa Edsa

kahapon, doon ay nakiisa

pagkapagod man ang nadarama

sa akin ay may bagong pag-asa

ang mga obrerong kapitbisig

mga maralitang nakikinig

kurakot na dapat inuusig

dinastiyang dapat nilulupig

patuloy ang aking pagninilay

hanggang ngayon ay di mapalagay

masa'y muli bang magtatagumpay

sa sama-samang kilos na tunay?

- gregoriovbituinjr.

Barya lang po sa umaga

BARYA LANG PO SA UMAGA

sakay ako / ng traysikel / nang makita

yaong paskil: / "barya lang po / sa umaga"

kahit sa dyip / may ganyan ding / paalala

pagkat walà / pang kita ang / namasada

barya muna / sa umaga'y / iniipon

dahil bagong / labas lamang / nila iyon

may panukli / na rin sila / bandang hapon

iyan ang sa / araw-araw / nila'y layon

ang barya ko'y / inihandâ / na kaagad

bago pa man / ang sinakyan / ko'y umusad

anong payak, / barya muna / yaong hangad

sa bulsa na'y / dudukutin / ang pambayad

silang tsuper / ay tuloy lang / sa pagkayod

habang tayong / mananakay / ay susunod

sa paskil na / paalala / kahit pagod

"barya lang po / sa umaga" / nang may lugod

- gregoriovbituinjr.

02.25.2026

* mapapanoood ang bidyo sa kawing na: https://www.facebook.com/share/r/1ArmgWgX1f/ 

Sa Edsa40

SA EDSA40

patuloy na maniningil ang mamamayan

sa mga kurakot sa pondo nitong bayan

tama lang magalit! singilin ang kawatan!

mandarambong sa kaban, dapat parusahan!

"Ikulong na 'yang mga kurakot!" ang hiyaw

ng sambayanan laban sa mga nagnakaw

sa buwis, pondo at kabang bayan, sumingaw

nilang baho'y sobrang nangamoy, nilalangaw

Edsa ay tandâ ng sama-samang pagkilos

ng mamamayang pinahihirapang lubos

noon ng diktadura; ngayon dahil sa ghost

projects, masa'y binabahâ wala mang unos

ang bayang kinorap ay naging basang sisiw

muli tang magkaisa, O, Bayang Magiliw

lalo't pag-ibig sa baya'y di magmamaliw

dapat trapong kurakot, managot, magbitiw!

- gregoriovbituinjr.

02.25.2026

Makatâ

MAKATÂ

kaming mga makatâ

mangangathâ ng tulâ

at samutsaring akdâ

kayraming parikalâ

at mga talinghagà

alay namin sa madlâ

sakaling di palagay

sa naganap sa búhay

ang tula'y aming tulay

sa kabilâ ng lumbay

sa tulâ binabaling

ang isyung tumitining

na sa diwa'y nagsupling

sa tulang aming sining

- gregoriovbituinjr

02.24.2026

(Pebrero ay Buwan ng Sining)

Paglalakad habang nagninilay

PAGLALAKAD HABANG NAGNINILAY

matapos panoorin ang pelikulang SAKADA

ay lumabas na ako doon sa Cine Adarna

at pinagninilayan ang nasabing pelikula

tilà sa aking pluma ito'y nagbigay-pag-asa

ikalimampung anibersaryo ng sineng iyon

kwento ito ng mga naaping sakada noon

na pinagsamantalahan at nagtayô ng unyon

at paglaya sa kaapihan ang kanilang layon

nangyayari pa ngayon ang kanilang kalagayan

dahil asyenda'y pag-aari pa rin ng iilan

nagpapatuloy pa ang makalumang kaayusan

at laksang kahirapan ay di pa nawawakasan

sa Edsa at 40, patuloy nating tuligsain

ang mga kurakot sa pondo nitong bayan natin

naninilay ko nga'y kayrami pang isyu't usapin

ng masa ang dapat dinggin, solusyunan, lutasin

- gregoriovbituinjr.

02.24.2026

* mapapanood ang bidyo sa kawing na: https://www.facebook.com/share/r/1AEJoMyQGj/ 

Higit 50 natabunan sa Rizal Landfill

HIGIT 50 NATABUNAN SA RIZAL LANDFILL

tilà naulit ang nangyari sa Payatas

higit dalawang dekada nang nakaraan

natabunan ng basura ang mamamayan

ngayon naman ay doon sa Rodriguez, Rizal

aba'y nagka-trashlide din nito lang Enero

doon naman sa Binaliw landfill sa Cebu

at ito'y tuluyang isinara umano

kayâ krisis sa basura'y lumalang todo

kayraming sa mga basura nabubuhay

mapakinabangan pa'y kinakalaykay

ng mga nangangalkal, pambiling tinapay

at pagkain ng anak nilang binubuhay

may mananagot ba sa ganyang aksidente?

sa naganap ba'y sinong ating masisisi?

gobyerno ba o naguhuang residente?

anong gagawin nang ito'y di na mangyari?

- gregoriovbituinjr.

02.24.2026

* headline sa pahayagang Abante at Bulgar, Pebrero 23, 2026